షాద్‌నగర్‌`నవభూమిప్రతినిధి: రంగారెడ్డి జిల్లా షాద్‌నగర్‌లో తీవ్ర విషాదం చోటు చేసుకుంది. ఇక్కడి సౌత్‌ గ్లాస్‌ పరిశ్రమలో భారీ పేలుడు సంభవించడంతో ఫ్యాక్టరీలో ఉన్న ఆరుగురు కార్మికులు మృతి చెందారు. శుక్రవారంనాడు దాదాపు 150 మంది కార్మికులు పని చేస్తుండగా ఫ్యాక్టరీలో గ్యాస్‌ కంప్రెష్‌ చేస్తుండగా ఒక్కసారే పేలడంతో ఆరుగురు అక్కడికక్కడే మృతి చెందారు. మృతులు ఉత్తరప్రదేశ్‌,బిహార్‌ రాష్ట్రాలకు చెందిన వారుగా గుర్తించారు. గాయపడిన బాధితులను సమీపంలో ఉన్న ప్రైవేట్‌ ఆసుపత్రిలో చేర్పించగా అక్కడ చికిత్స పొందుతున్నారు. పేలుడు వల్ల ఫ్యాక్టరీ పైకప్పు కూలగా గ్లాస్‌ ముక్కలు సైతం బాధితులకు గుచ్చుకొని గాయపడ్డారు. పోలీసులు కేసు నమోదు చేసి దర్యాప్తు చేస్తున్నారు.